Takriban watu watatu wamefariki na wengine kadhaa kujeruhiwa baada ya watu wenye silaha nchini Haiti kuwashambulia waandishi wa habari, polisi, na maafisa wa afya wakati wa mkutano wa kutangaza kufunguliwa tena kwa hospitali kuu ya umma katika mji mkuu, Port-au-Prince.
Shambulio hilo lilitokea Jumanne, ambapo waandishi wa habari Markenzy Nathoux na Jimmy Jean walipoteza maisha, sambamba na afisa mmoja wa polisi. Tukio hilo lilitokea wakati waandishi walipokuwa wakisubiri kuwasili kwa Waziri wa Afya, Lorthe Blema, katika hospitali hiyo ambayo awali ilikuwa imetekwa na kuharibiwa na magenge kabla ya kurejeshwa na serikali mnamo Julai mwaka huu.
Msemaji wa polisi, Lionel Lazarre, amethibitisha kuwa afisa wa polisi aliuawa, huku msemaji wa Online Media Collective, Robest Dimanche, akieleza kuwa waandishi wengine walijeruhiwa katika shambulio hilo.
Muungano wa genge la Viv Ansanm, ambalo linadhibiti maeneo makubwa ya Port-au-Prince, umekiri kuhusika na shambulio hilo. Katika video iliyochapishwa mtandaoni, genge hilo lilidai kuwa halijaidhinisha kufunguliwa tena kwa hospitali hiyo, ambayo walikuwa wameikalia na kuharibu mnamo Machi mwaka huu.
Picha zilizochapishwa mitandaoni zinaonesha waathirika wa shambulio hilo wakiwa wamejeruhiwa au kupoteza maisha ndani ya jengo hilo.
Mkuu wa baraza la mpito la rais wa Haiti, Leslie Voltaire, alisema: “Tunatoa pole kwa familia zote za wahasiriwa, haswa Polisi wa Kitaifa wa Haiti na vyama vyote vya waandishi wa habari.”
Shambulio hili linaashiria changamoto kubwa zinazoendelea nchini Haiti, ambapo magenge ya wahalifu yanazidi kudhibiti maeneo makubwa ya nchi, huku juhudi za serikali kurejesha utulivu zikikumbana na upinzani mkali.
Author: Mujuni Henry
JUNIITV
Related Posts 📫
