Iran imetangaza Ijumaa kuwa imefanikiwa kurusha chombo cha anga za juu kupitia programu yake mpya, hatua inayodaiwa na nchi za Magharibi kuwa ni sehemu ya kuboresha programu ya makombora ya balistiki ya Tehran.
Kwa mujibu wa kituo cha habari cha Sauti ya Amerika (VOA), urushaji huo ulifanyika katika kituo cha anga za juu cha Imam Khomeini, kilichopo kwenye kijiji cha jimbo la Semnan. Iran ilitumia roketi ya satellite ya Simorgh, ambayo mara kadhaa imekuwa ikifeli katika majaribio ya awali. Hata hivyo, tangazo hilo la mafanikio halijathibitishwa huru na vyanzo vya nje. Jeshi la Marekani halikutoa maoni yoyote mara moja baada ya kutakiwa kufanya hivyo.
Tangazo la Iran linakuja wakati ambapo Mashariki ya Kati inakabiliwa na hali tete, ikiwa ni pamoja na vita vya Israel dhidi ya Hamas katika Ukanda wa Gaza na sitisho la mapigano linaloyumba huko Lebanon.
Marekani, kupitia kauli za awali, imeonya kwamba urushaji wa satellite na programu za anga za juu zinazotekelezwa na Iran zinakiuka azimio la Baraza la Usalama la Umoja wa Mataifa. Azimio hilo linahimiza Tehran kutojihusisha na shughuli zinazohusisha makombora ya balistiki yenye uwezo wa kusafirisha silaha za nyuklia.
Hata hivyo, vikwazo vya Umoja wa Mataifa vilivyohusu programu ya makombora ya balistiki vilimalizika muda wake mnamo Oktoba 2023, hatua inayozidisha mvutano wa kidiplomasia kati ya Iran na mataifa ya Magharibi.
Serikali ya Iran imeendelea kusisitiza kuwa programu yake ya anga za juu ni ya malengo ya kiraia pekee. Eneo la urushaji katika jimbo la Semnan ni sehemu muhimu ya mpango huo, ingawa nchi za Magharibi zinaamini kuwa shughuli hizo zinaweza kusaidia maendeleo ya teknolojia ya kijeshi.
Urushaji wa satellite za Iran umeibua mjadala mkubwa wa kimataifa, huku mataifa kama Marekani yakihofia uwezekano wa teknolojia hizo kutumika katika kuunda silaha za nyuklia. Katika muktadha wa sasa wa mvutano wa kisiasa Mashariki ya Kati, hatua yoyote ya Iran inatazamwa kwa jicho kali na jumuiya ya kimataifa.
Author: Mujuni Henry
JUNIITV
Related Posts 📫
