Rais mteule wa Marekani, Donald Trump, ameonesha kutoridhishwa na hatua ya Ukraine kurusha makombora ya masafa marefu yaliyotolewa na Marekani ndani ya Urusi. Katika mahojiano yaliyofanyika Alhamisi na jarida la Time, Trump amesema wazi kuwa hatakubaliana na matumizi ya silaha hizo nje ya mipaka ya Ukraine.
“Sikubaliani kabisa na kutuma makombora mamia ya maili ndani ya Urusi. Kwa nini tunafanya hivyo?” amesema Trump, huku akisisitiza kuwa Marekani haitakata uungaji mkono wake kwa Ukraine kwa sababu msaada huo ni muhimu katika juhudi za kumaliza vita.
Washington hivi karibuni imeipatia Ukraine makombora ya masafa marefu aina ya ATACMS, ambayo yana uwezo wa kushambulia hadi umbali wa maili 190 (takriban kilomita 300). Hatua hiyo imewapa Ukraine nguvu ya kupenya ndani ya ardhi ya Urusi, hali ambayo imeongeza mvutano kati ya Kyiv na Moscow.
Makombora hayo yamesababisha ulipizaji kisasi kutoka kwa Urusi, ambayo imejibu kwa kutumia kombora lake jipya la hypersonic. Licha ya mvutano huo, Trump amesisitiza kuwa Marekani ina wajibu wa kuhakikisha Ukraine inapata msaada wa kutosha kwa ajili ya kujilinda na kupigania uhuru wake.
“Uungaji mkono wetu kwa Ukraine ni msingi wa juhudi za kumaliza vita hivi kwa njia ya haki,” amesema Trump.
Hatua ya Marekani kuipatia Ukraine makombora ya ATACMS imekosolewa na baadhi ya wadau wa kimataifa, huku ikionekana kama ongezeko la hatari ya kuendelea kwa vita. Makombora haya yanajulikana kwa uwezo wake wa kushambulia malengo kwa umbali mrefu na kwa usahihi wa hali ya juu, jambo ambalo linaweza kuchochea mgogoro zaidi katika eneo hilo.
Huku hayo yakijiri, Moscow imeonya kuwa matumizi ya makombora hayo ndani ya mipaka yake yanavuka mistari nyekundu, na yamesababisha hatua kali za kijeshi kutoka kwa Urusi, ikiwemo majaribio ya teknolojia mpya ya hypersonic.
Author: Mujuni Henry
JUNIITV
Related Posts 📫
